Abaday gihingusgan Task Force Klarex nga Serbisyo sa Kable

GIHINGUSGAN ni Konsehal Roger Abaday, chairman sa komite sa public order and safety ug vice chairman sa Task Force Klarex nga Serbisyo sa Kable, nga mapadali ang paglabang sa ordinansa aron masiguro nga limpyo ang mga nagbitaybitay nga wire sa poste ug malikay sa disgrasya ang mga motorista ug katawhan nga  lumalabay.

Kini ang unod sa Special Report ni konsehal Roger Abaday atol sa sesyon niadtong lunes nga gidumala ni Bise Mayor Bebot Rodriguez.

Sumala ni Abaday nga gisugdan sa Task Force Kable, uban sa mga pribadong telecom company, ang pagpanghipos sa spaghetti wires sa kadalanan ug pag-ilis sa mga wooden post ngadto sa concrete post aron maplastada ug mahan-ay sa insakto ang mga wire nga nagkutay sa mga poste.

Siya midugang nga sa pagsugod sa operasyon sa task force kable, mokabat na sa 133 ka mga wooden post ang nakuha samtang ubay-ubay usab nga spaghetti wires ang nangahipos.

Nunot niini, kusganong giduso ni Abaday sa konseho nga mapadali ang nasangpit nga ordinansa alang sa maong katuyoan.

Ang maong sugyot ni konsehal Roger Abaday giduso ni Bise Mayor Bebot Rodriguez ngadto sa komite sa Public Utilities ni konsehal Eric Salcedo alang dugang pagtuon ug rekomendasyon. (MLR/SP)