Abaday gihingusgan matabangan ang TFO, PNP Maritime sa dugang ekipo

GIHINGUSGAN ni Konsehal Roger Abaday, chairman sa komite sa pubic order and safety, nga matabangan ang Task Force Oro (TFO) sa Philippine Army, ang PNP Maritime ug Philippine Coast Guard alang sa ilang dugang   kagamitan  sama sa drone, komunikasyon, gasoline ug uban pa nga magamit sa ilang operasyon.

Kini ang gipahibalo ni Konsehal Roger Abaday sa mga hintungdang ahensya atol sa tigom sa komite niadtong milabayng adlaw diin ang maong hangyo iyang giduso ngadto sa buhatan ni City Mayor Rolando “Klarex” Uy aron mapangitaan sa pundo.

Subay niini, nagpadangat sa ilang pasalamat sila si Col. Manny Estanilla, commanding officer sa Task Force Oro ug Commodore Dennis Rem Labay, acting commander sa Philippine Coast Guard Northern Mindanao sa maong tinguha ni Abaday.

Malaumon si Abaday nga matunol ang maong hangyo ngadto sa nasangpit nga ahensya tungod kay tumong niini ang pag-responde sa tawag sa panginahanglan ug pag-serbisyo sa katawhan sa dakbayan. (MLR/SP)