Abaday gihingusgan mapatuman Local Public Transport Route Plan

GIHINGUSGAN ni Konsehal Roger Abaday, chairman sa komite sa public order and safety, ang pag-implementar sa Local Public Transport Route Plan (LPTRP) sa syudad tungod kay dili lang kini lokal nga palisiya kun diin usa usab kini ka rekisitos sa nasudnong pangagamhanan alang sa paglambo sa sektor sa transportasyon sa matag syudad.

Kini ang unod sa special report ni Konsehal Roger Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga angayan nang ipatuman ang LPTRP tungod kay makatabang kini nga mapagaan ang dagan sa trapiko ilabi na sa sentrong bahin sa syudad ug mahatagan sa insaktong serbisyo sa natad sa transportasyon ang katawhan nga anaa sa hinterland barangays.

Mahinumdoman nga mipagawas og kamanduan si City Mayor Klarex Uy alang sa temporaryong pagpahunong sa pagpatuman sa LPTRP tungod sa reklamo sa pipila ka mga driver ug operators nga apektado ang ilang rota.

Malaumon si Abaday nga tun-an pag-ayo sa komite sa Public Utilities ni Konsehal Eric Salcedo ang maong balaod alang sa katumanan ug implementasyon niini.

Ang maong taho ni Abaday giduso ni Bise Mayor Bebot Rodriguez ngadto sa komite sa public utilities alang sa dugang pagtuon ug rekomendasyon. (MLR/SP)