AB Leisure gipa-submit sa gikinahanglang rekisitos

GIMANDOAN sa komite sa games and amusement sa konseho  ubos ni Konsehal Roger Abaday ang kadagkoan sa AB Leisure Exponent Inc. sa pagsunod ug pagduso sa gikinahanglang rekisitos bahin sa ilang  laraw pag-establisar ug pag-operate sa PAGCOR-approved games diha sa ikaduhang andana sa Robinson Mall, Rosario Crescent, corner Florentino, Limketkai Center.

Sa tigom sa komite niadtong Lunes, Septembre 23, 2025, ang representante sa maong korporasyon  mibutyag nga aduna na silay kasamtangang operasyon sa SM Uptown ug magsilbi  nila kining sangang buhatan kon maaprobahan.

Gipasabot ni Konsehal Abaday  nga walay supak ang komite sa maong operasyon basta ilang masunod ang gikinahahanglang rekisitos nga gisitar sa balaod alang sa maong matang sa negosyo.

Hinoon, ang representante sa korporasyon mipasalig nga andam silang mosunod sa balaod ug sa paglukat sa tanang gikinahanglang rekisitos sa labing dali nga panahon.

Sa higayong makompleto na sa proponent ang tanang  rekisitos, mopahigayon gilayon sa aktwal nga inspeksyon ang komite kauban ang mga hintungdang buhatan sa kagamhanan.

Ang tigom gitambongan usab nila ni Konsehal George Christopher Goking ug ABC President Marlo Tabac. (JRG/SP)