₱510M infra projects mapatuman

BALOR sa P510 milyones alang sa siyam (9) ka proyekto sa imprastraktura ang gilantaw nga mapatuman karong tuiga.

Kini ang nasukip sa giuyonan sa Konseho sa Syudad ubos ni Bise Mayor Bebot Rodriguez nga 2025 Supplemental Annual Investment Program (SAIP) No. 2.

Lakip niini ang P100 milyones alang pagtukod sa dalan padulong sa FS Catanico Falls sa Barangay FS Catanico; P100 milyones alang sa dalan paingon sa CdO Heritage Tree, Barangay Cugman; P100 milyones alang sa dalan paingon sa Guadalupe Shrine, Barangay Balubal; balor P60 milyones sa dalan gikan Barngay Balubal padulong sa Libona, Bukidnon; ug balor P30 milyones alang sa pagtukod sa River Dike diha sa Taguanao, Barangay Indahag.

Gigahinan usab ang P40 milyones alang sa mga proyekto pagtukod og flood control diha sa Bigaan River, Gusa Side sa Barangay Gusa; balor P30 milyones alang sa River control dinha sa Purok 1-A ug Villa Ernesto Subdivision-Phase 2; P40 milyones alang sa preventive maintenance-secondary roads: city coastal by-pass road-chainage ug P10 milyones alang sa pagrehabilitar ug extension sa Macabalan Fire Staion, ning syudad.

Ang maong mga proyekto gilantaw nga makatabang sa paghatag sa dugang kaarangan sa kinabuhi sa matag Kagay-anon. (RNQ/SP)