48 infra projects sa CDO nakompleto na pagtrabaho


MOKABAT sa 48 ka mga proyekto sa imprastraktura sa ikaduhang distrito sa dakbayan sa Cagayan de Oro ang nakompleto na pagtrabaho.

Kini subay sa binulang status report nga giduso sa Cagayan de Oro City 2nd District Engineering Office ngadto sa buhatan ni Bise Mayor Bebot Rodriguez.

Lakip sa mga nakompletong proyekto mao ang pagtukod og multi-purpose building sa barangay Consolacion ug Lapasan; pag-aspalto sa Cugman by-pass road; pagtukod og dalan nga adunay drainage sa barangay Agusan ug pagtul-id sa multi-purpose building sa Barangay 1.

Ang maong mga proyekto gipundohan ubos sa 2022 Regular and Local Infrastructure projects sa DPWH.

Dugang nakompleto mao ang mga proyektong gipundohan ubos sa 2021 Regular and Local Infrastructure projects nga naglangkob sa pag-aspalto sa Sayre Highway; pagsemento sa dalan dinha sa barangay Indahag ug Puerto; pagtibawas sa duha ka andanang edifisyo ug multi-purpose building sa 2nd District Engineering Office; pagtukod og flood control structure dinha sa Alae River, Bugo; pagtukod og flood control structure sa Agusan River sa barangay Agusan ug Cugman; pagsemento sa dalan dinha sa barangay Bugo, Camaman-an, Macasandig, Lapasan, Gusa ug Cugman; pagtukod og multi-purpose building sa barangay Balubal, Cugman, FS Catanico, Tablon, Macabalan, Gusa, Camaman-an, Brgy 23, Puerto, Agusan, Bugo, Indahag, Lapasan, Macasandig ug Cugman; pagtukod og road slope protection structure sa Sayre Highway, pagsemento sa CDO Port Road, pagtukod og drainage structure dinha sa Sayre Highway ug Butuan City-Cagayan de Oro City –Iligan City Road; pagtukod og parallel bridge –Cugman 1 parallel bridge; retrofitting sa Umalag Bridge 2, pag-instalar og mga suga dinha sa Coastal Road gikan sa barangay Gusa paingon sa Agora, Lapasan, ug pagtul-id sa multi-purpose building sa barangay Nazareth.

Ang pagduso sa rehiyonal nga buhatan sa binulang status report kabahin sa gipatumang panagtambayayong sa ahensya ug sa lokal nga kagamhanan sa tinguha nga maangkon ang hapsay nga pagpatuman sa mga proyekto.

Niini, dako ang pasalamat ni Bise Mayor Bebot Rodriguez sa walay puas nga pag-abag sa DPWH dinha sa paghatag og dugang kaarangan ug kalamboan sa dakbayan sa Cagayan de Oro. (SP/JNortiza)