4-story school bldg matukod sa West City Central School

DUGANG kaarangan sa natad sa edukasyon ang matagamtaman sa kabataan sa barangay Carmen ug kasikbit nga mga barangay.

Kini human giuyonan sa Local School Board atol sa tigom sa miaging semana nga gidumala ni Mayor Klarex Uy ang proyekto pagtukod og upat ka andanang school building nga adunay 12 ka lawak saringan.

Tinguha niini nga ang tanang kabataan nga nagtungha sa West City Central School makaangkon sa hamugaway nga mga lawak saringan ug de kalidad nga edukasyon.

Nasayran nga ang proyekto mobalor og P66 milyones ug kuhaon gikan sa Special Education Fund.

Niini, nagpasalamat si Konsehal Suzette Magtajas-Daba, chairman sa komite sa edukasyon, sa administrasyon ni Mayor Uy sa paghatag og prayoridad sa natad sa edukasyon ug sa pagtubag sa kakulangon sa mga lawak saringan sa nahisgotang tunghaan tungod sa nagkadaghan nga mga tinun-an.