top of page

3-storey 9-classroom Bolao Elem Sch matukod sunod tuig

Gilantaw nga matukod sa umaabot tuig ang tulo ka andanang edifisyo alang sa Bolao Elementary School sa Barangay Iponan.

Kini human nasukip sa giaprobahang 2023 Annual Investment Plan (AIP) sa konseho sa syudad ubos ni Bise Mayor Bebot Rodriguez ang proyekto pagtukod sa maong edifisyo nga adunay siyam ka lawak saringan nga pundohan ubos sa Special Education Fund (SEF).

Si Konsehal Suzette Magtajas-Daba, chairman sa komite sa edukasyon, malaumon nga sa pagtukod sa dugang mga proyekto sa imprastraktura sa edukasyon mahatagan og mahayag nga kaugmaon ang kabataan sa dakbayan sa Cagayan de Oro.

Niini, siya mapasalamaton nga taliwala sa nasinating pandemya ang kagamhanan ubos sa administrasyon ni Mayor Klarex Uy walay puas nga naninguha sa paghatag og hamugaway nga mga tunghaan nga hitsas sa facilidad.

Ang maong proyekto mobalor og P15 milyones kapin.

Ang mga proyekto pagtukod og mga edifisyo sa mga tunghaan magtabang dinha sa pagtunol sa de kalidad nga edukasyon ngadto sa kabataan dili lamang sa barangay diin nahimutang ang tunghaan kun dili lakip na sa kasikbit nga mga dapit.


bottom of page