3 projects balor P424 mil sa Brgy 31 mapatuman

KAPIN sa P424 mil ang gigahin sa Konseho sa Barangay No. 31 alang sa pagpatuman sa pipila ka mga programa ug proyekto ubos sa 20% Development Fund (DF). Kini ang nahisukip sa 2023 Annual Budget sa barangay nga giuyonan sa Konseho sa syudad ubos ni Bise Mayor Jocelyn Rodriguez. Ang maong annual budget adunay gibanabanang kinitaan ug galastohon balor P7,861,812.00. Lakip usab sa gipundohan sa barangay alang karong tuiga mao ang 5% Calamity Fund ug 10% SK Fund –Youth Development Program. Ubos sa 20% DF mao ang proyekto pag-instalar og mga suga sa kadalanan, paglimpyo sa mga kanal ug pagtul-id ug pagpalambo sa ilang multi-purpose hall ug pagpatuman sa uban pang programa ug proyekto nga maghatag sa dugang kalamboan sa barangay. Ang resolosyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ug reglamento ubos ni Konsehal Ian Mark Nacaya.