2026 budget sa Brgy. 28 giaprobahan sa Konseho

MAPATUMAN na sa Barangay 28 ang ilang gihan-ay nga mga programa ug proyekto alang karong tuiga.

Kini human ang Konseho sa Syudad sa milabayng sesyon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa Barangay 28 nga may kalabotan sa ilang 2026 Annual Budget nga adunay gibanabanang kinitaan ug galastuhon balor P4,478,147.00.

Lakip sa gipundohan sa Brgy. 28 mao ang 20-porsyentong Development Fund balor P592,055.00; samtang P447,815 ang gigahin alang pagpatuman sa mga programa sa Sangguniang Kabataan; P10 mil ang gigahin alang sa feeding program sa mga kabataan; P70,000 alang sa paghimo sa pathways samtang P80,055 usab ang gitagana alang sa rehabilitasyon sa ilang multi-purpose center ug uban pang mga programa nga maghatag kaayohan sa katawhan.

Ang 2026 annual budget sa Barangay 28 miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug sa komite sa pamalaod ug reglamento ni Konsehal Edgar Cabanlas. (MLR/SP)