top of page

2023 Exec budget hearing sugdan sa dili madugay

Sugdan sa dili madugay sa konseho sa syudad ubos ni Bise Mayor Bebot Rodriguez ang pagtuki sa gisumeteng 2023 Executive Budget ni Mayor Klarex Uy alang sa dakbayan sa Cagayan de Oro.

Kini human ang konseho sa sesyon niadtong Lunes nga gidumala ni Presiding Officer Protempore Konsehal Edgar Cabanlas misagop sa resolosyon nga nagmugna sa tibouk konseho isip committee of the whole aron mopahigayon sa pagtuki sa 2023 Annual Budget nga pangunahan sa chairman sa komite sa panalapi.

Ang maong budget mobalor og P7.8 bilyones, P6.82 kapin ang gahin alang sa General Fund samtang P977 mil ang Special Account–Local Economic Enterprises/Utilities. Kini aduna lay P300 milyones nga omento itandi sa kasamtangang budget sa 2022.

Gihatagan sa prioridad nga mapatuman sa umaabot tuig ang mga programa ug proyekto sa natad sa panglawas lakip na ang mga lakang alang sa recovery gikan sa pandemya, pagpalapad sa mga programa kontra kapobrehon, social protection programs, padayon nga pagtunol sa mga panimalay ug pagpatitulo sa mga lote.

Gilaraw usab ang kusganong kampanya kontra droga, suporta sa kapolisan ug pagmugna sa community volunteer force ingon man pagpatuman sa mga programa aron maabot ang tinguhang mahunong na ang local communist armed conflict.

Gilantaw nga sa umaabot nga tuig mapatuman gayud ang mga programa ug proyekto diin ang katawhan ug mga barangay maoy nag-ila ug nagtumbok.





コメント


bottom of page