top of page

2023 Annual Budget sa SK sa Brgy. Canitoan giaprobahan

GILANTAW nga mapatuman na ang mga programa ug proyekto alang sa kabatan-onan diha sa Barangay Canitoan.


Kini human ang Konseho sa Syudad, sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa resolusyon sa Sangguniang Kabataan sa barangay diin nasukip ang ilang 2023 SK Annual Budget nga adunay gibanabanang kinitaan ug galastohon balor P3,626,686.00.

Lakip sa gipundohan mao ang unom ka mga dagkong proyekto nga naglangkob sa Youth Skills Development program balor 175 mil, equitable access to quality education balor P490 mil, pagproteher sa kinaiyahan ug pagpangandam batok sa kalamidad balor P245 mil, programa kabahin sa panglawas balor P220 mil, kampanya kontra droga balor P150 mil ug active citizenship balor P499 mil.


Gihatagan usab sa prioridad sa SK sa barangay ang pagpalit og usa ka set sa sound system balor P50 mil ug usa ka computer set balor P50 mil aron magamit sa ilang buhatan.

Si Konsehal John Michael Seno, Chairman sa Komite sa Sports and Youth Development ug usa sa nagpaluyo sa gisagop nga resolusyon, mipadayag sa iyang suporta sa maong lakang human nakita nga nasubay kini sa balaod ug dako ang ikatabang alang sa kaarangan ug kalamboan sa kabatan-onan.


Ang resolusyon nga gipasaka sa konseho alang sa maong katuyuan gipaluyohan usab sa Komite sa Pamalaod ni Konsehal Edgar Cabanlas.

Comments


bottom of page