Lim magtuon sa Waste Segregation Law sa Baikingon


Si konsehal Alam Lim, chairman sa komite sa barangay affairs, padayong nagtuon sa ordinansa nga gipalabang sa barangay Baikingon, ning syudad nga naglatid sa mga giya ug patakaran sa ilang Solid Waste Management Program.


Kini nag-require sa tanang residente pagbahin bahin o’ pag-segregate sa ilang mga basura ngadto sa malata, dili malata ug mapuslan pa.


Niini, gilatid usab ang pagtukod og Material Recovery Facility (MRF) alang sa mga recyclables ug composting activities sa makolektang basura nga mapuslan pa gikan sa kabalayan.


Ang ordinansa sa barangay nagpahamtang og multa ug silot ngadto sa mga masapon nga maglabay og basura diha sa mga publikong lugar sama sa dalan, kanal, drainage, parke, plazas.


Ang multa naglangkob sa P300 ug usa ka adlaw nga community service alang sa unang kalapasan, P500 ug tulo ka adlaw nga community service sa ikaduhang kalapasan ug P 700 ug upat ka adlaw nga community service alang sa ikatulo ug sunod pang mga kalapasan.


Malaumon ang barangay nga pinaagi sa maong balaod mahimo pang mapuslan ang mga recyclable nga basura ug mamintinar ang hingpit nga kalimpyo sa dapit gawas nga matudloan ang barangay sa tukmang pagbahin bahin sa mga basura. (SP/Yonggals)