Balor P3.6M aircon bus gidonar pabor sa CdeO

Paborableng girekomendar ni Konsehal George Goking, chairman sa komite sa ways & means, ang tanyag sa Rural Transit Mindanao, Inc. (RTMI) pagdonar og usa ka airconditioned bus pabor sa kagamhanan sa dakbayan.

Ang komite ni Goking miduso sa gisugyot nga Deed of Donation alang sa maong katuyoan ngadto sa komite sa pamalaod ni konsehal Ian Mark Nacaya alang sa dugang pagtuon ug rekomendasyon.

Ang RTMI midonar og bus sa tinguha nga maabagan ang kagamhanan dinha sa pagtubag sa mga nag-unang panginahanglan ug kalihokan sa edukasyon, panglawas, youth & sports development, ug human settlement.

Lakip niini mao ang uban pang mga kalihokan nga nagkinahanglan sa transportasyon nga maoy tumong sa maong donasyon isip kabahin sa social responsibility sa kompanya.

Nasayran nga ang maong bus mobalor og P3.6 milyones.

Ang mga dokumento alang sa maong katuyoan miagi na sa makuting pagtuon sa buhatan sa City Legal.

Gikalipay ni Goking ang maong lakang tungod kay kini dako og ikatabang ngadto sa katawhan nga adonay panginahanglan sa transportasyon. (SP/APD)