Suzette mipasalamat, midayeg sa gipatumang Tsuper Iskolar

Hugot nga gipasalamatan ug gidayeg ni konsehal Suzette Magtajas-Daba, chairman sa komite sa edukasyon, ang buhatan sa Technical Education and Skills Development Authority (TESDA), Land Transportation Office (LTO), Land Transportation Franchising and Regulatory Board (LTFRB) ug Department of Transportation (DOTr) sa malampusong paglusad sa Tsuper Iskolar sa miaging adlaw diha sa Grand Caprice, Limketkai, ning syudad.

Ang kalihokan gitambongan sa nagkadaiyang transport group leaders sa dakbayan.

Tumong sa proyekto mao ang pag-abag ug pagtabang sa tanang drivers nga apektado sa Public Utility Vehicle Modernization Program (PUVMP) sa nasud nga gilantaw ipatuman sa hingpit sa umaabot Agosto 2020.

Niini, si konsehal Suzette Magtajas-Daba miaghat sa mga driver sa pampublikong sakyanan sa pagbisita sa buhatan sa TESDA aron makapili sa gustong kursong kuhaon ug dugang saktong impormasyon.

Malaomon ang konsehal nga pinaagi sa programa daghan sa mga driver sa syudad ang makabenepisyo aron mahatagan sa kalamboan ug kaarangan ang ilang kapanginabuhian. (SP)