Nacaya misugyot pagdeklara og Elder Abuse Awareness Day


Si Konsehal Ian Mark Nacaya miduso og sugyot ordinansa nga magdeklara sa Hunyo 15 matag tuig nga adlaw pagpahibalo sa mga pang-abuso ngadto sa mga katigulangan (Elder Abuse Awareness Day).


Mao kini ang unod sa iyang special report atol sa sesyon sa konseho niadtong lunes nga gidumala ni bise mayor Kikang Uy.


Matod niya nga kini nga sugyot balaodnon nga ginganlan og Cagayan de Oro Elder Abuse Day Ordinance nunot sa Resolusyon No. 66/127 sa United Nations General Assembly.


Mahinungdanon kaayo ug takos nga mahatagan sa pag atiman o pagtagad ang atong mga hamtong kay kabahin sila sa kalamboan sa katilingban, pasabot ni Nacaya.


Sa maong sugyot, ang buhatan sa City Social Welfare and Development (CSWD), Senior Citizens, accredited non-government organizations ug private sector magtambayayong alang sa pagmugna sa mga patakaran ug pamaagi alang sa epektibong pagpatuman sa intensibong kampanya.


Lakip niini mao ang pagtuon sa mga programa alang sa kasayuran sa katawhan sa katungod sa mga hamtong ug pagproteher kanila dinhi sa dakbayan.


Ang maong taho giduso ni bise mayor Kikang Uy ngadto sa komite sa Senior Citizens ni konsehal Leon Gan alang sa pagtuon ug rekomendasyon. (SP)