Bonding sa pamilya ning panahon sa bakasyon gisugyot ni Pascual


SUMMER NA GAYUD. Mao kini ang pamahayag ni konsehal Jay Pascual, chairman sa komite sa turismo.


Niining panahon sa pagtapos sa tuig tingklase sa nagkadaiyang tunghaan sa dakbayan oras usab nga mag-bonding ang mga pamilya, kahigayonan sa paghatag og bakasyon sama sa pagduaw sa mga tourist spots sa dakbayan.


Anaay atong Kagay-an Resort Spring nga naghatag og ubos nga entrance fee diin ang makabansay bansay sa ilang paglangoy ilabina ang kabataan, ang mapangahason nga kasinatian sa White Water River Rafting, ang kaanindot og matahom sa palibot diha sa High Ridge, Hugo Lounge ug Ultra Winds nga nagsilbi usab og lamiang mga pagkaon.


Alang sa mahiligon sa kinaiyahan, anaa ang Macahambus Adventure Park sa Barangay Bayanga; Mapawa Nature’s Park ug Migtugsok Falls sa Cugman, Sinulom Falls sa Tignapoloan; Catanico Falls sa FS Catanico ug Monigue Crystal Cave sa Mambuaya, ning syudad.


Dugang pa, makadani ang nagkadaiyang parke nga nahimotang sa sentro sa syudad nga mahimong suroyan sa pamilya nga makadaginot sa gastosan sama sa Vicente de Lara Park, Gaston Park ug Golden Friendship Park (Plaza Divisoria).


Siya midasig ug miaghat sa katawhan ilabina sa mga ginikanan nga magplano alang sa bakasyon sa kabataan aron mapabati ang ka-importante sa paghatag sa oras sa matag myembro sa pamilya, dugang pamahayag ni konsehal Pascual. (SP/Thurax)