Pascual mipahalipay sa mga piniriso sa City Jail nga nakahuman sa G11


Mainitong gipahalipayan ni Konsehal Jay Roa Pascual, vice-chairman sa komite sa edukasyon, ang 19 ka mga tinun-an sa Persons Deprived of Liberty (PDL) ubos sa ALS-Senior High Alternative Responsive Education Delivery (SHARED) kinsa malamposong nakahuman sa Grade 11 (G11) niadtong Abril 3, 2019 diha sa City Jail Male Dormitory, ning syudad.


Unom niini ang nakadawat og pasidungog alang sa academic excellence (with honors).


Kini ang unang Senior High School Program alang sa PDL sa nasud nga gitagaan og pagtagad nga gipasiugdahan sa atong kagamhanan ug giabagan sa buhatan sa DepEd, DepEd Regional ALS, Lumbia National High School, BJMP Region 10 ug BJMP City Jail Male Dormitory, pamahayag ni Pascual.


Siya midugang nga ang kagamhanan naningkamot paghatag og saktong serbisyo aron matunol ang patas nga kahigayonan ngadto sa tugkaran mismo sa mga binilanggo nga mahuman sa ilang pagtuon ug makab-ot sa umaabot ang kurso sa kolehiyo.


Dugang pa, anaa sa pagpaningkamot ang pag-angkon sa kalampusan sa edukasyon. Wala sa hut-ong sa katilingban, gawasnon ka man o’ priso. Anaa sa edukasyon ang dugang kalamboan sa kinabuhi sa tawo. Liberty May be deprived but education cannot be shackled, pasabot sa konsehal. (SP/Thurax)