Public hearing sa omento sa bayad sa Cargo Handling karong adlawa

Usa si Konsehal George Goking, chairman sa komite sa trade and commerce nga motambong sa ipahigayong public hearing karong alas 2 sa hapon alang sa gihangyong omento sa bayronon sa Cargo Handling (CH).

Ang kalihokan himuon dinha sa GAD Hall, PPA PMO/C Admin. Building 2, Gate 5, Agora Road, Lapasan, Port Area, Cagayan de Oro City.

Kini nunot sa hangyo sa Oroport Cargo Handling Services Inc., (OROPORT) nga mausbawan ang gisingil nga bayronon diha sa pantalan sa dakbayan.

Gipasabot nga niadtong tuig 2012 una nang mihangyo og omento sa bayronon sa cargo handling ang Oroport diin 10% nga usbaw ang naaprobahan sa PPA Management niadtong Hunyo 2013 ug dugang dugang 9% nga omento ang gipatuman niadtong tuig 2015.

Niini, ang Oroport mihangyo og 17.8% nga omento sa bayronon alang sa conventional ug containerized cargoes.

Malaumon si Goking nga sa ipahigayong public hearing makab-ot ang makiangayon ug patas nga balayronon sa cargo handling alang sa kaayuhan sa Oroport ug sa mga shipping lines, shippers ug consignees dinha sa pantalan. (SP/APD)