Sports Clinic gitakda dinha sa brgys Iponan, Consolacion

Madasigon si konsehal John Michael Seno, chairman sa komite sa youth and sports development, pagpahibalo sa tanang kabataan nga nagpadayon ang sports clinic ugmang adlawa, Marso 30, 2019, Sabado, diha sa Barangay Iponan ug sa umaabot Marso 31, 2019 diha sa Barangay Consolacion.

Ang kalihokan magsugod sa alas 7 sa buntag hangtod sa alas 5 sa hapon diha sa covered court sa maong mga barangay.

Kini nga programa gisugdan niadtong miaging tuig sa kagamhanan sa dakbayan sa panguna ni konsehal Seno inubanan sa City Sports Committee ubos ni Jaymar Rivera.

Tumong niini nga mahugpong ang kabataan ug mahataga’g lingaw o aktibidad ingon man magiyahan sa saktong direksyon sa natad sa paugnat sa kusog ilabina dinha sa mga bag-ong teknik sa dulang basketball.

Nasayran nga mokabat sa 56 ka mga bata ang nakapahimulos sa programa sa barangay Macasandig samtang 75 usab ang misalmot sa barangay Patag sa milabay’ng semana.

Dako ang akong pahalipay ug pasalamat ngadto sa tanang lumilihok nga mga opisyales sa barangay ug Sangguniang Kabataan (SK) sa kalampusan sa kalihokan, pamahayag sa konsehal.

Niini, siya nanawagan sa kabataan sa Iponan ug Consolacion pagpahimulos sa maong libreng kalihokan nga gitinguha paghatag kanila sa dugang kadasig nga mamahimong atleta sa nagkadaiyang tunghaan. (SP)