Gaane nangusog mapalapdan serbisyo sa Brgy Health Stations

Dako ang pasalamat ni Konsehal Malou Gaane, chairman sa komite sa panglawas, sa suporta sa Xavier University -Maria Reyna Hospital aron mapaarang ang serbisyo sa natad sa panglawas sa tanang Kagay-anon.

Kini human ang maong tambalan mitunol sa ilang serbisyo ngadto sa mga molopyo dinha sa relocation site sa barangay Indahag pinaagi sa pagdawat og konsultasyon sa natukod nga Barangay Health Station (BHS).

Matod ni Gaane nga ang maong BHS gitukod sa Department of Health (DoH) ubos sa Health Facility Enhancement Program (HFEP) sa tinguha nga mapaabot ngadto sa tanan ang serbisyo sa panglawas.

Siya midugang nga ang XU-Maria Reyna nagpadala sa ilang mga doktor ug uban pang kawani dinha sa barangay Indahag aron modawat og konsultasyon kausa matag bulan.

Ang atong mga relocation sites ang gihatagan sa prioridad nga matukuran og mga BHS, Gani, hapit na usab mahuman ang gitukod dinha sa barangay Balubal relocation site ug kun matunol na pabor sa kagamhanan sa dakbayan, hayan daghan nang katawhan ang masilbihan, dugang sa konsehal.

Dako ang akong paglaum nga kun matunol na ang BHS dinha sa Balubal, mapaabot na usab ang serbisyo ngadto sa mga molopyo sa dapit. Kini gawas pa sa itunol nga serbisyo sa atong City Health Department, panapos ni Gaane. (SP)