Daba nangusog mapanumbalik sa kabataan mga maayong gawi


Maayo unta nga ibalik lantaw nato ang mga maayong gawi sa atong mga kabataan ilabina ang dakong pagtahod ug pagrespeto sa ilang mga ginikanan.


Kini ang gustong ipanumbalik ni konsehal Reuben Daba, chairman sa komite sa social services, atol sa sesyon niadtong Lunes nga gidumala ni bise mayor Kikang Uy.


Sa iyang special report, gustong ipaduol ni Daba ngadto sa mga kabataan nga nag-edad og 3 anyos paingon sa 7 anyos ang mga maayong pulong sa Ginoo pinaagi sa paghangyo sa mga relihiyosong sector sa pagbisita kanunay sa atong mga Child Development Center sa kabarangayan aron manumbalik sa kabataan ang pagkamahinadlukon sa Ginoo.


Akong makumpara ang kabatan-onan sa among panahon nga makakita ug makatagbo sa mga hamtong ilabina gayud sa among mga ginikanan dako kaayo ang ilang pagrespeto pinaagi sa pag-amen ug paghatag sa katahuran, pamahayag sa konsehal.


Niini, gihangyo ni Daba ang konseho nga mopasar og resolusyon nga maghangyo sa atong mga relihiyosong grupo nga himoong regular ang pagduaw sa mga Child Development Centers sa syudad.


Samtang iyang gisugyot ang pag-abag sa mga ginikanan pinaagi sa paghimo sa ilang monthly evaluation sa gawi sa ilang mga anak.


Alayon niini, si bise mayor Kikang Uy nagtahas sa komite ni Daba paghikay sa mga plano alang sa katumanan sa maong dalaygon nga programa. (SP/El Kapitan)