Mga Kagay-anon giawhag pag-avail sa condonation programs sa SSS


Si konsehal Reuben Daba, chairman sa komite sa katilingbanong serbisyo nanawagan sa tanang sakop sa Social Security System (SSS) nga magpahimulos sa mga programa nga gitanyag sa ahensya.


Lakip niini mao ang penalty condonation program alang sa tanang employer nga wala nakabayad sa ilang binulang premium contributions sukad sa pagsugod sa operasyon sa ilang patigayon o’ negosyo.


Ang programa magsugod karong bulana hangtod sa Septembre 6, 2019. Sa paglapas sa maong panahon, ipatuman ang 3% nga penalty.


Sa kasamtangan, dili kolektahon sa ahensya ang maong multa agig epekto sa gipalabang nga RA 11199 kon Social Security Act of 2018 nga maghatag sa mga employer og kahigayonan nga makasugod nga limpyo ang balayronon.


Kini nga balaod naghatag og lugway ug kahigayunan nga principal contribution na lang ang bayaran ug wala nay penalty nga ipahamtang.


Dugang nga angayang mapahimuslan mao ang Loan Restructuring Program nga matapos na karong Abril 1, 2019.


Alang niadtong nakautang nga dugay na nga wala maatiman tungod sa mga kakulian, mahimong mapahimuslan ang gitanyag nga condonation ug lugway sa termino sa pagbayad ug pagwagtang sa mga multa.


Nanawagan si Daba nga pahimuslan kini nga kahigayunan aron malikayan ang amoroso ngadto sa ahensya. (SP/Thurax)