Daba nahingawa sa mga insidente pagpamato og sakyanan sa kadalanan



Nabalaka si konsehal Reuben Daba, chairman sa komite sa social services sa sunod sunod nga panghitabo nga pagpangbato sa mga sakyanan nga gikaangol sa mga biktima.


Kini ang unod sa special report ni Daba atol sa sesyon sa konseho niadtong Lunes nga gidumala ni bise mayor Kikang Uy.


Matod sa konsehal nga usa ka nagpakabanang lungsoranon ang nagpadangat kaniya og sulat nga ang iyang pamilya biktima sa maong hiwing binuhatan diin naigo sa ulo nga bahin ang iyang sakop sa pamilya human gilabay sa bato sa wala mailang nga responsable diha sa barangay Kauswagan.


Dugang ni Daba nga nakadawat usab siya og impormasyon sa susamang panghitabo sa pipila ka mga barangay dinhi sa syudad nga matod pa adunay mga masamdang biktima gawas pa sa damyos nga nahiaguman sa mga sakyanan.


Nabalaka ako nga kun kini nga insidente dili mapakgang basin daghan pa unya ang mabiktima, pamahayag ni konsehal Daba.


Nanawagan ang konsehal nga ipatuman unta matag karon ug unya ang pagpatrolya sa kapolisan sa ilang mga tagsa tagsa ka jurisdiction.

Nunot niini, giduso ni bise mayor Kikang Uy ang maong taho ngadto sa buhatan sa kwerpo sa kapolisan alang sa tukmang aksyon ug solusyon. (El Kapitan)