Mga programa, proyekto sa 6 brgys mapatuman

Mapatuman na sa unom ka mga barangay ang ilang mga programa ug proyekto ning tuig 2018.

Kini human ang konseho sa syudad sa sesyon kagahapon nga gidumala ni bise mayor Kikang Uy hiniusang mipalabang sa unom ka managlahing resolusyon nga nag-uli sa ordinansa sa Barangay 15, 18, 21, 24, 33 ug Baikingon diin nasukip ang ilang tagsa tagsa ka Annual Budget alang sa hingpit nga implementasyon.

Nasukip sa maong budgets ang listahan sa tanang mga programa ug proyekto sa nahisgutang barangay nga maoy gihatagan sa prioridad nga ipatuman alang sa dugang kaarangan ug kalamboan sa matag barangay.

Si konsehal Alam Lim, chairman sa komite sa barangay affairs ug presidente sa Liga ng mga Barangay mipasabot nga iyang gisuportahan nga mapadali ang pagpatuman sa maong mga proyekto sa tinguha nga mahatagan sa hingpit nga kalamboan ug kaarangan ang serbisyo nga ilang itunol ngadto sa ilang mga ginsakopan.

Ang resolusyon nga gisagop sa konseho alang sa maong katuyuan gipaluyuhan sa komite sa barangay affairs ni konsehal Lim ug komite sa pamalaod ug reglamento ni konsehal Ian Mark Nacaya. (Yonggals)