Calizo nagtuon sa lakang matukod dugang parking spaces sa sentrong bahin sa syudad

Padayong gitun-an sa komite sa roads and traffic

management ni konsehal Romeo Calizo ang lakang paghatag og insentibo ngadto sa mga nanag-iya og bakanteng lote nga himuong libreng parking area.

Ang sugyot ordinansa nga giduso ni konsehal Lordan Suan nagtinguha nga mahatagan sa kasayon ang mga motorista nga maglisod pagpangita og parking space dinha sa commercial district sa syudad.

Kini human iyang namatikdan nga adunay mga bakanteng lote sulod sa commercial business district sa syudad nga posibleng ma-convert nga parking spaces.

Sa sugyot, si Suan mipasabot nga mahatagan sa igo ug luwas sa peligro nga parking area ang tanan ilabina kadtong mga adunay opisyal nga katuyoan sa mga ahensya ug buhatan sa gobyerno nga nahimutang sa sentrong bahin sa dakbayan ug walay mga kaugalingong parking area.

Ang maong lakang maghatag usab og alibyo sa problema sa trapiko.

Niini, ang mga nanag-iya sa nahisgotang mga loteng gisugyot nga posibleng hatagan og insentibo dinha sa ilang pagbayad sa realty tax.

Ang komite subling motuki sa maong lakang sa tigom sa sunod semana.