Cagayan de Oro nagpabilin nga malinawon - Kon. Calizo

Dili angay kabalak-an ang sitwasyon sa kahusay ug kalinaw sa dakbayan.

Mao kini ang pamahayag ni konsehal Romeo Calizo, chairman sa komite sa police, fire and public safety ug Task Force Oro atol sa senimanang programa sa radio nga “Ang Konseho Karon: The Mover of Change and City’s Development uban ni konsehal Ian Mark Nacaya.

Si Calizo mipasalamat sa kwerpo sa kapolisan, militar ug intelligence unit sa goberno tungod sa ilang walay puas nga pagbantay sa kahusay ug kalinaw sa dakbayan.

Apan giangkon ni konsehal Calizo nga aduna gihapoy pipila ka hulga nga madawatan ug kini maoy gihatagan og pagtagad sa awtoridad.

Samtang lakip sa gituki ni konsehal Calizo ang planong pagbalhin sa 4th Infantry Division gikan dinha sa Camp Evangelista sa barangay Patag, ning syudad.

Lakip sa nakitang posibleng kabalhinan mao ang Kalilangan, Bukidnon ug Mayapay, Butuan ingon man ang gitanyag ni konsehal Jay Pascual nga ilang lote diha sa barangay Tignapoloan, ning syudad.

Dugang ni Calizo nga gipaabot nalang ang hukom sa Department of National Defense kun asa kini sila gustong mobalhin.

Niini, nanawagan si Calizo sa katawhan nga kanunay makigtambayayong sa gobyerno aron padayon nga maangkon ang kahusay ug kalinaw sa syudad. (El Kapitan)