Calizo nangusog mapalambo Patag National High School

Ang barangay Patag na lang ang nahabiling lowland barangay nga walay natukod nga mga edifisyo alang sa national high school.

Mao kini ang gitaho ni konsehal Romeo Calizo atol sa regular sesyon sa konseho kagahapong adlawa nga gidumala ni bise mayor Kikang Uy.

Matod ni Calizo nga sa kasamtangan adunay mga tinun-an sa Grade 7 ug Grade 8 ang Patag National High School (NHS).

Sa gihimong pre-enrollment alang sa umaabot 2018-2019 school year, mokabat sa 651 ka mga tinun-an ang nag-enroll na tungod kay aduna nay Grade 9 ug mga bag-ong tinun-an sa Grade 7.

Niini, adunay dili mominus sa 163 ka mga tinun-an ang nag-enroll sa Grade 9, 205 ang nag-enroll sa Grade 8 ug 218 ang nag-enroll sa Grade 7.

Apan, matod pa, 45 ka mga tinun-an lang ang angayan sa matag klase. Niini, nagkinahanglan ang tunghaan sa dili mominus 15 ka lawak saringan.

Sa kasamtangan, adunay lima ka classrooms ang tunghaan ug dugang duha nga padayong gitul-id. Kun mahuman, mokabat na sa pito ang mga classroom apan nagkinahanglan pa gihapon sa dugang walo.

Gani, ang principal uban sa mga magtutudlo ug mga ginikanan sa mga tinun-an nangita sa pamaagi nga mahimo ang klase pinaagi sa pagpatuman sa shifting sa klase o’ pagpabalhin sa ubang mga tinun-an sa laing mga tunghaan. Apan dili kini makaayo sa mga tinun-an, dugang ni Calizo.

Nunot niini, ang taho ni Calizo giduso ngadto sa komite sa edukasyon ni konsehal Suzette Magatajas-Daba alang sa dugang pagtuon ug daling rekomendasyon.