Diminishing balance interest rate gihangyong mapatuman sa GSIS



Sa tinguha nga matabangan ang liboang sakop sa Government Service Insurance System (GSIS) sa ilang mga balayronon, si konsehal Ian Mark Nacaya mihangyo nga unta mapatuman ang Diminishing Balance Interest Rate Method sa ilang loan programs.


Sa sesyon sa konseho niadtong Lunes nga gidumala ni bise mayor Kikang Uy, si Nacaya mipadayag sa iyang nasuta nga kadako sa gabayrang interest sa mga sakop sa GSIS sa ilang mga loans tungod kay flat interest rate man ang gipatuman.


Ug kun kini dili mabayran, magkadako ang balayronon kay compounding interest man ang gipatuman, sumpay sa konsehal.


Siya midugang sa iyang kahingawa kun nakatabang ba sa mga sakop sa GSIS ang dako kaayong interest rate. Unta sama sa mga banko nga nagpatuman sa diminishing balance interest rate method, mao na usab unta ang ipatuman sa korporasyon.


Sa maong pamaagi, matag bayad sa usa ka sakop sa ilang binulang amortization, mag-anam usab kagamay ang bayaran nga interest tungod kay makulangan naman ang outstanding loan amount gumikan sa principal repayment.


Niini, ang konseho mipasaka og resolosyon nga naghangyo sa GSIS pagpatuman sa maong sugyot taliwala nga ang komite sa trade and commerce ni konsehal George Goking mopahigayon usab sa pagtuon sa maong taho.