Calizo nahingawa sa kapasidad sa K-12 graduates pagpanarbaho

Hugot ang kahingawa ni konsehal Romeo Calizo sa giluwatang pamahayag sa Philippine Chamber of Commerce and Industry (PCCI) kalabot sa kapasidad sa mga mogradwar sa Senior High School dinha sa pagpanarbaho.

Sa sesyon sa konseho niadtong Lunes nga gidumala ni bise mayor Kikang Uy, si Calizo mitaho nga ang Department of Education (EdpEd) ug ubang ahensya sa gobyerno nga nalambigit sa pagpatuman sa K to 12 program nagdahom sa dili mominus 1.3 milyones ka mga tinun-an sa tibouk nasud nga mogradwar sa Senior High School sa umaabot Marso 2018 nga andam nang manarbaho.

Matod niya nga usa ang dakbayan sa Cagayan de Oro sa napulo ka mga pilot areas diin gipatuman sa hingpit ang programa sa DepEd niadtong Hunyo 2015, usa ka tuig nga una sa pagpatuman sa K to 12 sa ubang mga dapit sa nasud.

Apan, matod niya, nga segun sa giluwatan sa PCCI, adunay daghang mga kompanya nga magpanuko sa pag-hire sa mga gradwado sa K to 12 tungod kay daghan pang mga gradwado sa kolehiyo nga walay trabaho.

Kini taliwala nga daghan sa mga mogradwar sa umaabot Marso aduna nay kapasidad nga manarbaho. Gawas niini, giingon nga ang adunay kakulangon ang programa sa pagtanyag sa gikinahanglang basic essnetial technical trainings ug igong kahibalo ngadto sa mga tinun-an sa Senior High School.

Gani, matod pa, ang 80 ka oras o’ duha ka semanang work immersion nga gi-require sa mga tinun-an sa Senior High School gikatahong dili igo nga nahitsas sila sa gikinahanglang kahibalo ug skills aron mamahimong work-ready.

Ang maong taho ni Calizo giduso ni bise mayor Kikang Uy ngadto sa komite sa edukasyon ni konsehal Suzette Magtajas-Daba alang sa dugang pagtuon ug rekomendasyon.