LTO gihangyong mabinisaya eksamin sa driver’s license

Ang konseho sa syudad ubos ni bise mayor Kikang Uy mihangyo sa Land Transportation Office (LTO) nga mahatag sa pulong binisaya ang eksamin sa pagkuha og driver’s license.

Kini human si konsehal Edna Marban-Dahino, sa sesyon niadtong Lunes, mitaho nga ang usa sa mga importante nga gisalig sa katawhan sa dakbayan mao nga makahatag og panginabuhian sa katawhan ug usa na niini mao ang pagmaneho sa sakyanan.

Ang driver’s license sa kadaghanan dili lamang usa ka opisyal nga dokumento apan gilantaw nga usa kini nga rekisitos sa pagpangempleyo ug gigamit sa kapanginabuhian sa matag adlaw, pasabot sa konsehal.

Ang pagkuha sa lisensya dili sayon tungod usab kay daghan ang dili makapasar panahon sa examination tungod sa kakulangon sa edukasyon ug maglisod sa pagsabot kay anaa sa English nga linguahe.

Nakita nga usa kini sa mga problema sa mokuha sa eksamin hinungdan nga mapugos ang usa ka aplikante nga mag-underground aron lang makakuha sa maong lisensya.

Niini, si Dahino miingon nga dako og matabang ang LGU sa pagpangita sa pamaagi nga mapasayon ang maong eksamin pinaagi sa paghubad ngadto sa pulong binisaya.

Gawas pa, ang komite sa public utilities ug Roads & Traffic Administration makahatag usab sa giya ug ma-edukar ang mga drayber pinaagi sa seminars aron kini makapasar sa examination. (APD)