Ocon mihikay sa POW alang sa covered court sa Sitio Berjaya, Camaman-an

Gihangyo ni konsehal Zaldy Ocon, chairman sa komite sa public works, ang City Engineer’s Office pinaagi ni Engr. Rolando Pacuribot nga ihikay ang program of works (POW) ug banabana sa galastohon alang sa gilaraw nga proyekto pagtukod og covered court diha sa Sitio Berjaya sa barangay Camaman-an.


Kini subay sa hangyo sa konseho sa barangay nga mabutangan og atop ang ilang basketbolan alang sa kalingawan sa mga nanimuyo sa dapit ug dako og ikatabang sa kabatan-onan aron mahilikay sila sa mga bisyo ilabina sa gidiling druga.


Naglaum si barangay chairman Pedro Arda sa Camaman-an nga matugonan sa komite ang ilang hangyo tungod ug alang sa katawhan sa dapit.


Sa milabayng tigom sa komite sa milabayng semana, gipasalig ni Ocon nga himuon niya ang tanan aron matubag ang gihangyo ug matibawas sa buhatan sa City Engineer’s sa labing dali nga panahon ang paghimo sa program of works.


Mas maayo usab aron mahangyo nako si Mayor Oscar Moreno nga mahatagan og gahin ang maong proyekto, pamahayag ni Ocon.


Niini, nagpadayag og pasalamat si kapitan Arda sa komite dala sa panghinaot nga matunol kanila ang ilang gihangyo. (El Kapitan)