Goking misugyot NFA Patag magamit sa pag-distribute sa bugas

Si Konsehal Christopher George Goking, chairman sa komite sa trade and commerce, kusganong mihangyo sa National Food Authority (NFA) nga magdesisyon sa daling panahon kalabot sa hangyo nga gamiton ang ilang bodega sa Barangay Patag alang sa direktang pagbaligya sa tag-P20 matag kilo nga bugas ngadto sa publiko.

Kini ang gibutyag sa konsehal atol sa sesyon sa konseho niadtong Lunes nga gidumala ni Presiding Officer Pro Tempore Councilor Roger Abaday agig reaksyon sa taho ni Konsehal Marlo Tabac mahitungod sa nasinati nga purwisyo sa katawhan nga buot mopalit sa tag P20 nga bugas diha sa NFA warehouse sa Barangay Tablon.

Matod ni Goking nga aduna nay gihimong sulat hangyo ang syudad ngadto sa NFA niadtong Marso 26 apan hangtod karon wala gihapon silay feedback.

Ang gikahingawa sa konsehal mao ang pag-antos sa katawhan sa paglinya unya dili naman diay matagaan gumikan kay adunay limit sa 600 ka tawo matag adlaw ang gitugotang makapalit, sumpay ni Goking. (RNQ/SP)