Nacaya mipahimangnu sa FB users magmatngon batok mga hackers



Si konsehal Ian Mark Nacaya, chairman sa komite sa pamalaod, mipahimangnu sa katawhan nga mahilig sa Facebook o’ social network sites nga magmatngon batok sa mga hackers.


Sa sesyon sa konseho niadtong Lunes nga gidumala ni bise mayor Kikang Uy, si Nacaya mibutyag sa iyang nasinati nga adunay nagsulay og abli sa iyang account sa social media human aduna siyay nadawat nga pagpahibalo pinaagi sa iyang email niadtong Disyembre 31, 2017 ug Enero 23, 2018 ug sa niaging pang mga panahon.


Ang maong pagsulay sa pag-abli sa iyang Facebook account nahitabo didto dapit sa Quezon City, sumpay sa konsehal.


Kini sama sa gikataho ni konsehal Lordan Suan kalabot sa online banking, kini sa social media, dugang ni Nacaya.


Matod niya nga aduna usay mga nadawat siyang reklamo gikan sa iyang mga higala. Dili man nato kini masolosyonan kay wala kitay igong kahibalo kalabot sa maong teknolohiya, apan posible natong mapahibalo ang katawhan nga kasagarang naggamit og social network sites nga magmatngon kanunay kontra sa mga hackers.


Taliwala nga adunay tagsa tagsa ka privacy settings ang mga social network sites, dili gihapon angayan nga magkompyansa kay posibleng magamit sa mga tawong adunay dautang kalihokan ang usa ka account, pahimangnu ni Nacaya.