Lugway sa ML sa Minda suportado sa konseho

Sa ikaduhang higayon subling nanawagan si konsehal Alam Lim, presidente sa Liga ng mga Barangay, nga suportahan ang programa ni Presidente Rodrigo Duterte ilabina na ang lakang paglugway sa Martial Law (ML) dinhi sa pulo sa Mindanao.

Kini ang unod sa special report ni Lim atol sa sesyon sa konseho niadtong Lunes nga gidumala ni bise mayor Kikang Uy.

Matod ni Lim nga wala siyay nakita nga kalapasan o’ pagpangabuso sa unang pagpatuman sa Martial Law sa Mindanao. Hinuon, nakatabang kini og dako alang sa pagkunhod sa krimen ug pagmintinar sa kahusay ug kalinaw sa Mindanao.

Iyang giangkon nga sa bag-o pa gipatuman ang Martial law adunay dili maayong epekto sa natad sa negosyo tungod kay ana-ay pagkunhod sa kinitaan sa pipila ka mga negosyante apan sa dihang nakita sa mga magpapatigayon nga maayo ang katuyuan sa Martial Law dali ra usab kining nakabangon ug nibalik sa normal ang operasyon sa mga negosyo sa Mindanao.

Niini, ang konsehal miawhag ngadto sa konseho nga mopasar og resolusyon paghatag suporta kang presidente Duterte sa tinguha nga malugwayan ang Martial Law sa pulo sa Mindanao.

Nunot niini, ang konseho sa panguna ni bise mayor Kikang Uy misagop sa Resolosyon nga naghatag og suporta sa maong katuyuan. (El Kapitan)