Konsultasyon pagpatuman sa 10-year Solidwaste Mgmt Plan karong buntag

Himuon karong alas 8 sa buntag dinha sa Barangay Hall sa barangay Carmen ang konsultasyon kalabot sa pagpatuman sa 10-year Solidwaste Management Plan sa dakbayan.

Ang kalihokan gipasiugdahan sa buhatan ni bise mayor Kikang Uy sa tinguha nga makuha ang panahom ug opinyon sa katawhan kalabot sa pagpatuman sa Ordinance No. 13130-2016 kon Solidwaste Management Ordinance.

Gitinguha niini nga mahatagan og dugang pang kaarangan ug kalamboan ang pagdumala sa dakbayan sa koleksyon ug paglabay sa basura gikan sa mga kabalayan sulod sa 80 ka mga barangay.

Ang kalihokan gipasiugdahan uban sa City Local Environment and Natural Resources Office (Clenro).

Gipaabot nga mohimo sa iyang pagpamulong si bise mayor Kikang Uy uban sa mga dinapit nga mamumulong nga mopahigayon og pagpasabot sa kabililhon sa balaod dinha sa matag panimalay alang sa limpyo ug malambuon nga dakbayan sa Cagayan de Oro.