Calizo mosusi sa giingong reward money pagpatay sa RTA Enforcer

Susihon ni konsehal Romeo Calizo, chairman sa komite sa police, fire and public safety sa konseho, ang taho nga adunay madawat nga reward money ang makatudlo aron masikop ang suspetsado sa pagpatay ni traffic enforcer Cris Cabingas.

Atol sa tigom sa komite gikatingala ni Calizo ang taho sa media tungod kay siya mismo wala masayod kun aduna bay pahalipay ang impormante ug pila ang kantidad niini.

Hinuon, gipasalig sa konsehal nga iyang sutaon kang Mayor Oscar Moreno kay katungod man kini sa mayor nga mohatag og reward money sa mga insidente nga susama niini. Dugang ni Calizo nga dili lang angay mabalaka ang impormante kay matunol gyud kini ngadto kaniya.

Giklaro ni Calizo nga walay girekomendar ang iyang komite didto sa plenary mahitungod niini nga isyu.

Nunot niini, taliwala kun adunay pahalipay o’ wala, hugot niyang gipasalamatan ang impormante sa pagtaho dayon sa kapolisan hinungdan sa pagkasikop sa suspetsado ug nahatagan sa hustisya ang biktima nga si RTA enforcer Cris Cabingas. (El Kapitan)