Gaane nangusog mapatuman Hazardous Wastes Control Law


Si konsehal Malou Gaane, chairman sa komite sa panglawas, nangusog nga mapatuman sa hingpit dinhi sa dakbayan sa Cagayan de Oro ang probisyon sa Akta Republika 6969 kon Toxic Substances and Hazardous and Nuclear Wastes Control Act of 1990.


Sa tigom karong buntag sa komite, gipaabot tukion ang sugyot ordinansa nga maglatid alang sa epektibong pagdala, kolekta ug paglabay sa mga makadaut ug delikado nga mga matang sa basura.


Lakip niini ang mga basura sa mga hospital sama sa pathological ug infectious waste, chemical wastes, grasa ug petrolyo, asbestos, pesticides, electrical ug electronic equipment, special waste ug susamang mga basura.

Kini human nasayran sa konsehal nga adunay gilabay nga pathological wastes dinha sa landfill sa dakbayan.

Ang sugyot ordinansa nagpahamtang og multa nga dili mominus sa P5 mil o’ pagkapriso gikan sa 30 ka adlaw ngadto sa unom ka bulan.


Niini, si Gaane nagdapit sa tag-iya ug tigdumala sa Polymedic Medical Plaza, Cagayan de Oro Medical Center, JR Borja General Hospital, Nephrology Center of Cagayan de Oro Dialysis Inc., Golden Kidney Specialists Dialysis Center, Northern Mindanao Dialysis Clinic, Inc. ug Capitol University Medical Center aron pagpa-ambit sa ilang panahom ug opinyon kalabot sa maong sugyot.