P3.43M alang sa FMR project hisgutan sa kom ni Dahino


Ang komite sa finance, budget & appropriations ni konsehal Edna Marban-Dahino gitakda nga magtigom karong alas 2 sa hapon dinha sa hawanan sa konseho.

Tukion atol sa tigom ang gihangyong gahin balor P3.43 milyones kapin gikan sa current appropriation, Annual Budget CY 2017 ubos sa “Special Programs/Projects: Upgrading/Concreting og farm to market road (LGU Equity)” sa Agricultural Productivity Office.


Ang maong gahin nagrepresentar sa 20% nga paatbang pundo sa dakbayan sa gisugyot nga proyekto pagpalambo sa barangay Balubal (Purok 1) ngadto sa Sitio Lagilay Access Road nunot sa Integrated Natural Resources & Environmental Management Project (INREMP) sa DENR.


Kini usa ka grant financing facility pinaagi sa Municipal Development Fund Office sa Department of Finance (DOF-MDFO) alang sa implementasyon sa maong napiling proyekto.


Ang maong gahin gipamatud-an sa Local Finance Committee (LFC) nga available na ug mahimo nang magamit alang sa maong katuyoan.

Niini, si Dahino nagdapit nila ni City Agriculturist Dr. Hector San Juan, OIC-Regional Director Edwin Andot sa DENR-10, City Planning and Development Coordinator Engr. Isidro Borja, Assistant City Treasurer Ramon Antonio Mendoza, City Accountant Atty. Beda Joy Elot, City Budget Officer Atty. Percy Salazar. (APD)