Nacaya misuporta sa lakang mamugna Metro Cag de Oro

Hugot nga gisuportahan ni konsehal Ian Mark Nacaya, chairman sa komite sa planning and development, ang lakang pagtukod sa Metropolitan Cagayan de Oro.

Sa tigom sa iyang komite sa milabayng adlaw, si Nacaya mipasalig sa tiunay nga pagsuporta sa mga pasiunang lakang nga pasiugdahan sa National Economic Development Authority (NEDA-10) ug Regional Development Council (RDC-10).

Siya misugyot nga unta mahatagan sa briefer ang kadagkoan sa mga munisipyo ug syudad nga gisugyot masakop sa maong Metro CDO.

Niini, si NEDA-10 Director Leon Dacanay, sa tigom sa komite, mibutyag nga ilang ipahigayon sa ikatulong semana sa Oktubre, ning tuig atol sa kasaulogan sa Statistics Month ang usa ka forum o’ dialogo kalabot sa pagmugna sa maong Metro CDO.

Segun sa plano alang sa maong proyekto ang Metro CDO langkoban sa mga syudad sa Cagayan de Oro ug El Salvador, munisipyo sa Manolo Fortich, Bukidnon ug mga munisipyo sa Tagoloan, Villanueva, Claveria, Jasaan, Opol, Alubijid, Laguindingan, Gitagum, Libertad ug Initao sa Misamis Oriental.

Giingon nga ang lakip sa mga kaakuhan sa Metro CDO mao nga mamahimong sentro sa trading ug industrial services sa Mindanao, major gateway ug transhipment hub sa Mindanao, maghatag sa linkages tali sa ubang mga metropolitan, regional ug sub-regional centers, ingon man ang international market tungod sa Mindanao Container Terminal nga nahimutang sa PHIVIDEC Industrial Estate, magpabiling prime educational center sa Northern Mindanao, host sa mga dagkong commercial malls ug service establishments sama sa Ayala, Robinsons, Gaisano, Limketkai ug SM groups ug host sa usa sa dealerships sa luxury cars sa nasud o’ sa Mindanao sama sa BMW, Chevrolet ug Peugeot.