Lao nagpahigayon og seminar sa PUV Drivers and Operators

Kapin sa gatos ka mga driver ug operator sa pampublikong sakyanan ang mitambong sa paglusad sa PUV Operators ug Drivers Seminar niadtong Biernes nga gipasiugdahan sa komite sa public utilities ni konsehal Teodulfo Lao Jr. inabagan sa mga ginsakpan sa Roads and Traffic Administration (RTA).

Ang programa nunot sa gitinguha sa administrasyon nga ma-promote ang professionalism tali sa mga road users ilabina ang mga driver sa pampublikong sakyanan, pamahayag ni Lao.

Kini usa ka programa nga maghatag og dugang kahibalo sa mga driver ug maghitsas kanila kabahin sa mga patakaran ug regulasyon ingon man mga lagda sa trapiko lakip na ang mga angayang buhaton ug dili angayang buhaton dinha sa kadalanan.

Dugang ni Lao nga angayan nga dasigon ang atong mga drivers nga kabahin sila sa kalihukan ug angayang ang tanang transport group motabang sa syudad, sa police, LTFRB ug LTO aron mamintinar ang kahapsay sa kadalanan.

Ang libreng seminar adunay tema nga “Balaod sa Trapiko Sundon Ta Para Likay ug Aksidente ug Multa” nga himoon matag Biernes gikan sa alas 8:00 sa buntag ngadto sa alas 5:00 sa hapon. Kini moluntad hangtod sa Disyembre, ning tuig.

Dinapit nga mamumulong sila si Engr. Nonito Oclarit,assistant department head sa RTA lakip usab ang mga personahe sa LTO ug LTFRB.

Nunot niini, giduso ni konsehal Lao nga mopahigayon ug programa nga Search for Outstanding Drivers sunod tuig ug basihan niini kadtong driver nga wala sukad maisyuhan og citation ticket. Iyang gisugyot nga makadawat kini og insentibo gikan sa syudad.