Smoking cessation clinic sa City Hall gihingusgan

Hugot nga gisuportahan ni konsehal Malou Gaane, chairman sa komite sa panglawas, ang pagtukod og Smoke Cessation Clinic alang sa dakbayan sa Cagayan de Oro.

Kini human nasayran sa konsehal nga aduna nay mga pasiunang plano alang sa pagtukod sa maong clinic inubanan sa pag-abag sa Department of Health (DoH).

Sa milabayng tigom sa komite, si Dr. Rachel Dilla sa City Health Office mibutyag nga aduna nay natumbok nga lawak diin ipahimutang ang nahisgotang clinic apan sa kasamtangan giokupahan pa kini sa usa sa mga branches sa Regional Trial Court (RTC).

Kun makabalhin na ang mga korte, masugdan na gilayon ang proyekto, pamahayag ni Dilla.

Niini, si Gaane malaumon nga makatabang og dako sa katawhan sa dakbayan nga gusto nang mohunong sa pagpanigarilyo ang maong clinic.

Ato kining hugot nga gisuportahan tungod kay kabahin kini sa atong gitinguhang mamahimong smoke-free ang dakbayan sa Cagayan de Oro, pasabot ni konsehal Gaane.