Ocon naningkamot makutayan og linya sa tubig Sta Cruz, Lumbia

Naglaum ang mga residente sa Sitio Sta. Cruz, Barangay Lumbia, ning syudad nga makutayan sa linya sa tubig ang ilang dapit.

Kini human ang komite sa urban poor ni konsehal Zaldy Ocon mihangyo ngadto sa tag-iya sa lote nga si Pepito Alvarez nga makaagi ang linya sa COWD sa iyang lote.

Matud ni Ocon nga magpatabang siya ni konsehal Jay Pascual sa paghangyo tungod kay iya kining uyuan ug dako ang posibilidad nga mosogut kini tungod ug alang sa kaarangan sa katawhan.

Niini, dako ang kalipay sa residente nga si Florentina Angcop, sitio leader sa dapit ug mibutyag nga dugay na nga panahon nga wala silay tubig ug gani magpalit lang sila og tubig sa Xavier Heights pinaagi sa ginalon nga layo ug hago kaayo alang kanila.

Nasayran nga wala matibawas sa COWD ang pagkutay sa linya sa tubig sa Sta. Cruz, Lumbia human mibabag ang legal counsel sa mga Alvarez. Hinoon, mipasalig si Eng. Butron sa COWD nga kun adunay panugot sa mga Alvarez andam nilang tibawason ang maong linya sa tubig.

Nunot niini, gidapit ni konsehal Ocon si konsehal Pascual uban sa pamilya sa mga Alvarez sa sunod panagtigom sa komite aron hangyoon ang ilang panugot. (El Kapitan)