Dugang doctors, nurses sa City Hospital gisuportahan

Kusganong gitin-aw ni konsehal Malou Gaane, chairman sa komite sa panglawas, nga iyang gisuportahan ang pag-empleyo og dugang mga doktor ug nars sa JR Borja General Hospital.

Sa tigom sa komite kagahapon nga gitambongan ni konsehal Reuben Daba ug kadagkoan sa City Hospital, si Gaane mipasabot nga ang komite wala gayud mibalibad sa sugyot nga madugangan ang kawani sa hospital sukwahi sa napatik sa usa ka lokal nga mantalaan.

Ako nakasabot sa kakulangon ug panginahanglan sa hospital apan angayan nga hatagan sa prioridad ang mga labing gikinahanglan nga posisyon tungod kay dako kaayo ang P25 milyones kapin nga gipangayong pundo alang sa maong sugyot, pamahayag ni Gaane.

Sa iyang bahin, si konsehal Reuben Daba midugang nga ang komite naninguha gayud nga madugangan ang kawani sa hospital tungod kay nakita niini ang kadaghan sa mga pasyente nga gadangop matag adlaw.

Apan, matod niya, kinahanglan nga hatagan sa unang pagtagad ang labing gikinahanglan ilabina ang paghitsas sa hospital sama sa Intensive Care Unit (ICU).

Niini, nauyonan sa komite nga unahon sa pagmugna nga mga dugang posisyon mao ang mga doktor, nars, pharmacists, psychologist, health education and promotion officer, medical technologist, biomedical technician, statistician, radiologic technologist, engineer, administrative officer ug administrative assistance.