2 mil, dugang iskolar sa CDO – Daba

DUGANG 2 mil ka mga tinun-an ang makapahimulos sa city college scholarship program sa dakbayan sa Cagayan de Oro.

Mao kini ang gibutyag ni Konsehal Suzette Magtajas-Daba, chairman sa komite sa edukasyon, human gipahigayon ang First Year Orientation and Get Together (FIOGET) alang sa bag-ong 2 mil ka mga Iskolar sa Dakbayan (IsDa).

Ang tinuig nga school to school orientation ug asembleya giandam sa kagamhanan ubos sa buhatan sa City Scholarship aron ipaila-ila ang vision, mission, student formation, mga kalihokan dinha sa student formation ug mga palisiya ug giya kalabot sa benepisyo nga gitunol sa kagamhanan.

Tumong usab sa kalihokan nga maila-ila sa mga iskolar ang ilang school coordinator ingon man mga personahe sa buhatan sa City Scholarship ug mapalambo ang panaghigalaay sa ubang mga iskolar pinaagi sa mga programa ug ubang kalihokan nga giandam alang kanila.

Dako ang kalipay ni Daba tungod kay face to face na ang gipahigayong kalihokan.

Niini, siya mipahalipay sa mga iskolar ug umaabot nga mga tinun-an sa mga tunghaan nga nakatambong sa maong orientasyon niadtong Agosto 9, 2022 diha sa Xavier University; Agosto 10, 2022 sa Lourdes College ug Agosto 11, 2022 diha sa Capitol University.

Alayon niini, si Konsehal Suzette nanawagan sa ubang iskolar nga dili mapakyas pagtambong sa susamang orientation sa umaabot Agosto 16, 2022 diha sa Liceo de Cagayan University; Agosto 22, 2022 sa USTSP; Agosto 25, 2022 sa Pilgrim Christian College, Southern Philippines College ug STI College, ug Agosto 25-26, 2022 diha sa Phinma- Cagayan de Oro College. (SP/RNQuiblat)