17 ka teen center matukod sa napiling mga tunghaan

GILANTAW sa kagamhanan ang kamahinungdanon sa pagpalambo sa panglawas sa kabatan-onan.

Kini human hiniusang giuyonan sa konseho sa sesyon niadtong Lunes nga gidumala ni Bise Mayor Bebot Rodriguez ang ordinansa nga naghatag og katungod ni Mayor Klarex Uy sa pagpirma sa Memorandum of Agreement (MoA) tali sa First Community Cooperative (FICCO), Oro Integrated Cooperative (OIC), City Hall Employees Multipurpose Cooperative (CHEMCO), Cagayan de Oro College (COC) Faculty and Employees Cooperative, ACDI Multi-purpose Cooperative,  Bureau of Customs X Multi-Purpose Cooperative, Del Monte Philippines, Inc. (DMPI) Employees & Community Credit Cooperative, Northern Mindanao Medical Center (NMMC), Mindanao Consolidated Cooperative Bank, MASS-SPECC Cooperative Development Center ug sa Department of Education - Division of Cagayan de Oro.

Ang MoA naglangkob sa panagtambayayong alang sa pagtukod og 17 ka Teen Center diin duha ang pagatukoron diha sa Puntod  National High School (NHS), CdeO City NHS-Senior High, Camaman-an NHS, Macasandig NHS, East Gusa NHS, Besigan NHS, Agusan NHS, Pedro “Oloy” N. Roa Sr. NHS, Tablon NHS, Balulang NHS, Lumbia NHS, Macabalan NHS, Bugo NHS, Gusa Regional Science HS ug lain duha sa Bayabas NHS.

Ang gisugyot nga teen center nagtumong sa paghatag ug accessible ug youth friendly nga facilidad sulod sa mga eskwelahan nga magtanyag og tukmang impormasyon sa mental health, sekswalidad ug reproductive health, teenage pregnancy, ug mga programa nga gidesinyo sa pagsangkap sa mga tin-edyer sa kahibalo, kahanas, ug serbisyo nga gikinahanglan alang sa ilang kalamboan ug kaayohan. (RNQuiblat/SP)