₱11.6-M budget sa Brgy Balubal giuyonan sa Konseho

HINGPIT nang matagamtaman  sa  katawhan sa Barangay Balubal ning syudad ang kalamboan sa ilang barangay karong tuiga.

Kini human ang Konseho sa Dakbayan sa sesyon nga gidumala ni Bise Mayor Bebot Rodriguez paborableng misagop og resolusyon nga nag-uli sa ordinansa sa maong barangay nga may kalabutan sa ilang annual budget nga adunay gibana-banang kinitaan ug galastohon balor ₱11,610,761 alang sa implementasyon.

Lakip sa gipundohan sa barangay sa maong budget ang pagrehabilitar sa ilang kadalanan, multi-purpose hall, water reservoir ug drainage system, pag-instalar og suga sa kadalanan, ingon man paghinlo sa mga kanal sa ilang dapit.

Gawas niini, migahin usab ang barangay og igong pundo para itukod sa material recovery facility, pagtukod og  koral sa ilang plaza, pagpatuman sa reforestation and greening ug uban pa nga magdalag kaarangan sa kinabuhi sa ilang ginsakopan.

Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos  ni Konsehal Edgar Cabanlas. (JRG/SP)