GILAOMAN nga mapatuman ang dugang infra projects alang sa mga mangingisda sa dakbayan human ang konseho ubos ni Bise Mayor Bebot Rodriguez sa miaging sesyon misagop sa Resolution No. 15823-2026 nga paborableng nag-endorso sa duha ka dagkong proyekto sa tuyo nga mapangitaan sa pondo ug masugdan ang implementasyon niini sa labing daling panahon.
Naglakip kini sa pagatukoron nga Cagayan de Oro City Fishport Project diha sa Barangay Macabalan. Kini pondohan ug ipatuman sa Nasyonal nga Kagamhanan pinaagi sa Philippine Fisheries Development Authority (PFDA) ug sa Department of Agriculture (DA).
Ang laing proyekto mao ang pag-establisar ug pagpalambo sa Cagayan de Oro Fish Landing Complex and Auxiliary Infrastructure ubos sa Philippine Fisheries and Coastal Resiliency (FishCoRe) Project sa DA - Bureau of Fisheries and Aquatic Resources (DA-BFAR), nga gipundohan sa World Bank.
Kini nga lakang nagtumong sa pag-modernize sa pasilidad sa pangisda sa dakbayan sa Cagayan de Oro ug pagpausbaw sa kita sa mga mangingisda.
Pinaagi niini nga mga proyekto, gilaoman nga mas mapalapdan pa ang kapasidad sa dakbayan sa pagproseso ug pagpreserbar sa mga kuha nga isda gamit ang modernong cold storage facilities ug uban pang auxiliary infrastructures nga makatabang sa pagkunhod sa post-harvest losses sa mga mangingisda.
Sa iyang bahin, si Bise Mayor Bebot mibutyag nga dili lang kini basta imprastraktura, kondili tubag kini sa hagit sa climate change ug pagpalig-on sa ekonomiya sa mga coastal communities pinaagi sa suporta sa World Bank ug sa nasudnong kagamhanan.
Gilaoman nga ang maong endorsement magbukas sa dalan alang sa mas hugot nga koordinasyon tali sa lokal nga kagamhanan ug sa mga nasyonal nga ahensya aron pormal nang masugdan ang phase-by-phase nga pagpatuman sa maong mga proyekto, sumpay sa bise mayor. (RNQ/SP)
GIPAKITA ni City Indigenous Peoples Mandatory Representative (IPMR) Konsehal Datu Roberto P. Cabaring ang lig-on nga suporta sa lokal nga kagamhanan pinaagi sa iyang pagtambong sa malampusong Barangay Canitoan IPMR selection process bag-ohay pa lamang.
Si Konsehal Cabaring mitambong isip opisyal nga representante ni Mayor Rolando "Klarex" Uy aron saksihan ang makasaysayanong kalihokan sa maong barangay.
Sa maong asembleya, pormal nga napili si Datu Gerold Suma-oy isip bag-ong Barangay IPMR nga maoy modala sa tingog ug katungod sa mga lumad sa Canitoan.
Gawas sa paghatag og suporta, gipaabot usab ni Konsehal Cabaring ang mga mahinungdanong update gikan sa kagamhanang lokal sa dakbayan, ilabi na ang mga kalihokan ug programa nga nakalinya alang sa kaayohan sa mga kaigsoonang lumad.
Gihisgotan usab sa konsehal ang mga pagpangandam alang sa umaabot nga pagsaulog sa National IP Month sa bulan sa Oktubre 2026.
Nahitabo ang maong kalihokan sa pagtinabangay sa mga lumadnong komunidad, tribal leaders, elders, stakeholders, ug sa National Commission on Indigenous Peoples-Misamis Oriental Provincial Office. (JRG/SP)
GIKLARO ni Konsehal Roger Abaday, chairman sa komite sa public order and safety, nga dili siya supak sa modernization program sa goberno ug sa Land Transportation Franchising & Regulatory Board (LTFRB) apan gusto lang niya nga adunay insaktong koordinasyon ug konsultasyon tali sa lokal nga pangagamhanan sa syudad aron hapasay ug han-ay ang pagpatuman sa maong programa.
Kini ang gipaambit nga reaksyon ni Abaday sa isyu sa pagsulod sa electronic vehicle o “Green Taxi” dinhi sa syudad nga gireklamo sa mga traditional taxi tungod kay nakaapekto kini sa ilang matag-adlaw nga kinitaan.
Dugang ni Abaday nga bisan og adunay mandato ang buhatan sa LTFRB apan aduna man usay ordinansa ang syudad nga angayan sang ipatuman, busa kinahanglan kaayo ang koordinasyon sa matag buhatan.
Malaumon si Konsehal Roger Abaday nga mahatagan sa tukmang solusyon ang maong problema sa opisina ni Mayor Rolando Klarex Uy uban sa mga opisyal sa LTFRB, mga taxi operator ug ang tigdumala sa green taxi. (MLR/SP)