DUGANG kalamboan ang matagamtaman sa kabataan sa dakbayan sa natad sa edukasyon.
Kini human ang hiniusang giuyonan sa Konseho ang Resolution No. 15821-2026 ug miduso ngadto sa Department of Education (DepEd) sa planong pagtukod og bag-ong tunghaan, ang Tinamparan Elementary School, diha sa Barangay Cugman.
Tumong sa maong lakang nga matubag ang nagkadakong panginahanglan sa de-kalidad nga edukasyon ug mapaduol ang tunghaan sa mga kabataan ilabi na kadtong anaa sa hilit nga mga komunidad sa maong barangay ug kasikbit nga dapit.
Gilaoman nga pinaagi niini nga kooperasyon sa lokal nga kagamhanan ug sa sektor sa edukasyon, mas mapalapad pa ang mga programa alang sa kaayohan sa kabataan sa dakbayan sa Cagayan de Oro.
Ang maong resolusyon gipaluyohan sa komite sa edukasyon ubos ni Konsehal Jing Daba ug sa komite pamalaod ug reglamento ni Konsehal Edgar Cabanlas. (RNQ/SP)
DAKONG kadungganan ang nakuha sa dakbayan sa Cagayan de Oro human opisyal nga gipasidunggan ang duha ka lokal nga buhatan sa kabatan-onan didto sa kaulohan niadtong Agosto 12 ning tuig.
Napili ang Oro Youth Development Office (OYDO) isip usa sa mga national finalists alang sa Outstanding Local Youth Development Office (Highly Urbanized City Category) sa prestihiyosong 2026 Philippine Sangguniang Kabataan Awards (PSKA).
Kini na ang ikaupat nga higayon nga nakuha sa OYDO ang maong pasidungog, nga nagpamatuod sa ilang tiunay ug mapadayonong serbisyo para sa kabatan-onan.
Gawas sa OYDO, napili usab isip national finalist ang SK Council sa Barangay Agusan alang sa Outstanding SK Council (Barangay Category –Highly Urbanized City).
Gipahalipayan ug giila ang OroYouth tungod sa ilang tiunay nga dedikasyon, kakugi, ug malungtarong komitment sa pagserbisyo ug paggiya sa mga kabataang Cagay-anon ngadto sa mas maayong ugma."
Si OYD Officer Lord Saver Centina ug SK Federation President Kenneth John Sacala nalipay ug hugot nga nagpasalamat sa maong kalamposan labina nga nahimong espesyal ang pag-anunsyo niini tungod kay natunong kini sa kasaulogan sa International Youth Day niadtong Agosto 12.
Ang maong mga pasidungog nagpakita lamang nga ang Cagayan de Oro nagpabilin nga sumbanan sa pag-asdang sa kaayohan ug kalamboan sa kabatan-onan sa tibook nasod Pilipinhon. (JRG/SP)
WALA magkulang paghatag og supporta ang goberno lokal ngadto sa nagtabang ug nag-abag nga mga ahensya sa goberno aron pabiling mapatunhay ang kahusay ug kalinaw sa dakbayan panahon sa kapistahan.
Kini ang pamahayag ni Konsehal Roger Abaday agig reaksyon sa special report ni Konsehal Yvy Emano atol sa sesyon niadtong Lunes nga gidumala ni Bise Mayor Bebot Rodriguez mahitungod sa gihangyo nga panginahanglan sama sa gasolina, pagkaon, allowance ug uban pa aron masiguro ang seguridad sa mga gihan-ay nga kalihokan alayon sa kasaulogan sa kapistahan sa syudad.
Sumala ni Abaday nga giseguro gayod sa syudad nga adunay igong gahin alang sa maong mga panginahanglanon ug ang pag-follow-up nalang maoy kulang.
Siya midugang nga iyang nahinabi si Mayor Klarex Uy atol sa People’s Day didto sa Upper Balulang ug kini mipasalig nga aprobado na ang pundo alang sa maong katuyoan.
Nunot niini, paninguhaon ni Abaday nga mapadali ang pagpagawas sa maong pundo aron maggamit sa gimugna nga task force nga maoy magbantay sa katawhan aron masiguro ang kahusay ug kalinaw panahon sa kapistahan sa Dakbayan. (MLR/SP)