NANGUSOG ang komite sa urban and rural poor sa konseho ubos ni Konsehal Al Legazpi nga masulosyonan ang hangyo sa mga sumusunod ni Caridad Lapis Fuentes nga mapapahawa ang mga settlers nga giingong nag-okupar sa ilang lote ingon man kadtong nag-okupar daplin sa dalan nga nahimutang atubangan sa ilang lote diha sa Barangay Camaman-an.
Sumala sa mga manununod ni Fuentes, nabalaka sila tungod kay ang mga natukod nga istraktura anaa mismo kilid sa national highway ug aduna nay interesadong mopalit sa ilang propedad.
Gawas sa giingong illegal settlers, duna usab silay renter nga wala na nila paabanga apan nagdumili kini sa paghawa ug mialigar nga ang gobyerno lamang ang adunay katungod nga mopapahawa kanila.
Atol sa maong tigom sa komite niadtong Biernes, gibutyag sa taga-barangay nga anaa sa "public land" ang mga namuyo kay anaa man kini sa daplin sa dalan. Gani, iya na kining gihatagan og igong panahon aron mobakwit apan wala gihapon kini manghawa.
Sa bahin sa City Assessor’s Office, ilang gikompirma base sa ilang rekord nga ang unang tag-iya sa maong lote mao ang pamilyang Labis, apan tungod sa natigayong road widening kaniadto, nadeklarar na kini nga road lot.
Samtang gipasabot sa City Engineering Office nga aduna nay unang survey nga gihimo ang usa ka pribadong surveyor nga gihangyo sa pamilyang Fuentes, diin giubanan pa kini sa mga barangay tanod, engineer, ug representante gikan sa DPWH ug nakita nga dunay mga istraktura nga nakasulod.
Apan tungod kay pribado ang maong survey, gisugyot sa CEO nga mas mayo ng sila mismo ang mopahigayon sa opisyal nga pagsukod aron matino ang tinuod nga estado sa lote.
Kini nga sugyot ang daling gipaluyohan ni Konsehal Legazpi aron mahatagan sa dinalian ug patas nga solusyon ang maong panagbangi.
Hinungdan nga gihangyo ni Konsehal Legazpi ang City Engineering Office nga mopahigayon og opisyal nga survey ug mosumite gilayon sa ilang report aron masulbad ang maong reklamo sa labing dali nga panahon. (JRG/SP)
NAGPASALAMAT si Konsehal Eric Salcedo, chairman sa komite sa public utilities, sa gihatag nga katin-awan ni Assistant Regional Director Mohammad Hajam Sarip sa buhatan sa Land Transportation Franchising and Regulatory Board (LTFRB) atol sa sesyon niadtong Lunes nga gidumala ni Presiding Officer Pro-Tempore Konsehal Roger Abaday nga Provisionary Authority ug anaa pa sa mapping ug testing sulod sa unom ka bulan ang gi-isyu sa maong buhatan ngadto sa green taxi aron maka-operate og drop off points pag-abot sa syudad.
Lakip sa gustong pakisayran ni Salcedo kon aduna bay mga kapunungan sa transportasyon ang mipadangat sa ilang pag-supak sa operasyon sa green taxi ug ang mga pamaagi ug basihan sa pagbabag sa maong operasyon.
Sumala ni Director Sarip nga pwede kini nga mahitabo diin ang ilang opisina sa LTFRB Region-10 maoy mo-endorso niini ngadto sa ilang central office alang sa tukmang disposisyon.
Nunot niini gipasalamatan ni Konsehal Salcedo ang pagtambong sa sesyon sa mga kadagkoan sa Land Transportation Franchising and Regulatory Board aron sa paghatag og katin-awan sa maong isyu. (MLR/SP)
GIHINGUSGAN ni Konsehal George Christopher Goking, chairman sa komite trade and commerce, ang plano alang sa mas luwas nga dapit-tabokanan sa dakbayan atol sa gipahigayong consultation meeting uban sa Department of Public Works and Highways (DPWH).
Ang maong consultation naghisgot sa gisugyot nga ordinansa nga nagtumong alang sa kaluwasan ug visibility sa mga pedestrian crossings pinaagi sa pagbutang og dedicated lightings sa mga pedestrian lanes sa dakbayan.
Mahinumdoman nga kini ang unod sa special report ni Konsehal Goking sa sesyon sa konseho diin iyang gihingusgan nga kinahanglan hayag ang mga pedestrian lanes labi na panahon sa gabii aron malikayan ang mga aksidente diha sa kadalanan.
Dako ang pagpasalamat sa konsehal ilabina sa buhatan sa DPWH nga gipresentahan ni District 2 Engineer JP Lisondra, sa City Engineer Office nga girepresentahan ni Engr. Paulo Lao ug Engr. Albert Dolores, sa Roads and Traffic Administration (RTA) nga gipresentahan ni Sherwin Cabactulan sa ilang suporta aron mapatuman ug mapalambo kini nga proyekto alang sa kaayohan sa publiko. (RNQ/SP)
